Սաղմոսներ 18

Գոհանում է իր հրաշալի փրկուելու համար և խնդրում է Աստուծոյ հզօր օգնութիւնը։

1 Երգողների գլխաւորին։ * Տիրոջ Էահուէի ծառայ Դաւիթի Սաղմոս, * որ այս երգի խօսքերն ասեց Տիրոջը Էահուէին այն օրումը, որ Տէրը Էահուէն նորան փրկել էր իր բոլոր թշնամիների ձեռքիցը եւ Սաւուղի ձեռքիցը. Եւ ասեց.

Սրտանց սիրում եմ քեզ, * ով Տէր Էահուէ՝ իմ զօրութիւնը։

2 Տէր Էահուէ, իմ վէմ, եւ իմ բերդ եւ իմ ազատիչ. Իմ Աստուած, իմ ամրութիւն, * որին ես յուսացած եմ։ Ով իմ ասպար եւ իմ փրկութեան եղջիւր, նա իմ բարձր աշտարակն է.

3* Ես օրհնեալ Տիրոջը Էահուէին կանչեցի, եւ իմ թշնամիներիցը կփրկուիմ։

4* Մահի լարերը շրջապատեցին ինձ, եւ կորստեան վտակները վախեցրին ինձ,

5 Գերեզմանի ցաւերը պատեցին ինձ, մահի որոգայթները հասան ինձ վերայ։

6 Ես իմ նեղութիւնումը կանչեցի դէպի Տէրը Էահուէն, եւ դէպի իմ Աստուածն աղաղակեցի. Նա լսեց իմ ձայնը իր տաճարիցը. Եւ իմ աղաղակը նորա առաջը հասաւ՝ նորա ականջներին։

7* Այն ժամանակ երկիրը դողաց ու շարժուեցաւ, եւ սարերի հիմունքները սարսափեցան եւ դողացին. Որովհետեւ նա բարկացաւ։

8 Ծուխ դուրս եկաւ նորա քթիցը, եւ փչացնող կրակ՝ նորա բերանիցը. Կայծակներ փայլատակեցին նորանից։

9* Նա խոնարհեցրեց երկինքը եւ վայր եկաւ, եւ մառախուղ կար նորա ոտների տակ։

10* Նա հեծաւ քերովբէի վերայ եւ թռաւ. Եւ * սլացաւ քամիի թեւերի վերայ։

11 Նա խաւարը ծածկոյթ դրաւ իր վերայ. * խորան եղան նորան չորս կողմովը խաւարային ջուրերը եւ երկնքի ամպերը։

12* Նորա առաջին փայլող լոյսիցը նորա ամպերն անցան, կարկուտ եւ կրակի կայծակներ դառան։

13 Եւ Տէրը Էահուէն որոտաց երկնքումը, եւ Բարձրեալն * իր ձայնը տուաւ կարկուտով եւ կրակի կայծակներով։

14 Եւ * նա իր նետերն ուղարկեց եւ ցրուեց նորանց, եւ կայծակները գցեց եւ շփոթեցրեց նորանց։

15 Եւ * երեւեցան ջրերի անդունդքը, եւ երկրի հիմունքը յայտնուեցան քո սաստելուցը, Տէր Էահուէ. Քո բարկութեան հողմի փչելուցը։

16* Նա վերեւիցն ուղարկեց եւ բռնեց ինձ. Նա շատ ջրերից հանեց ինձ։

17 Նա ազատեց ինձ իմ զօրաւոր թշնամիիցը, եւ իմ ատողներիցը, որ ինձանից զօրաւոր էին։

18 Նորանք իմ նեղութեան օրումը առաջս առան. Բայց Տէրը Էահուէն նեցուկ եղաւ ինձ համար։

19 Եւ * ինձ հանեց լայնարձակ տեղ եւ ինձ փրկեց. Որովհետեւ հաւանեց ինձ։

20* Տէրը Էահուէն բարի է անում ինձ իմ արդարութեան պէս, եւ ինձ հատուցանում է իմ ձեռքի մաքրութեան պէս։

21 Որովհետեւ ես պահեցի Տիրոջ Էահուէի ճանապարհները եւ իմ Աստուածանից ամբարշտութիւնով չհեռացայ։

22 Որովհետեւ նորա ամեն իրաւունքներն իմ առաջն են, եւ ես նորա պատուիրանքներն ինձանից չեմ հեռացնում։

23 Ես անարատ եմ նորա առաջին, եւ զգուշանում եմ իմ անօրէնութիւնիցը։

24* Ուստի Տէրը Էահուէն հատուցանում է ինձ իմ արդարութեան պէս. Իմ ձեռքի մաքրութեան պէս՝ նորա աչքի առաջին։

25* Ողորմածի եհտ ողորմած ես. Եւ անարատի հետ անարատ ես.

26 Իստակի հետ իստակ ես. Եւ * ծուռի հետ՝ ծուռ։

27 Որովհետեւ դու աղքատ ժողովրդին ապրեցնում ես. Եւ * բարձր աչքերը խոնարհեցնում ես։

28* Որովհետեւ դու լուսաւորում ես իմ ճրագը. Տէր Էահուէ Աստուածը լուսաւոր է անում իմ խաւարը.

29 Որովհետեւ քեզանով վազում եմ զօրքի վերայ. Եւ իմ Աստուծովն անց եմ կենում պարսպի վերայից։

30* Աստուծոյ ճանապարհը կատարեալ է. * Տիրոջ Էահուէի խօսքը կրակով մաքրուած է. * նա պահապան է ամեն իրան յուսացողների համար.

31* Որովհետեւ ո՞վ է Աստուած բացի Տէրիցը Էահուէիցը. Եւ ո՞վ է վէմ մեր Աստուածանից ջոկ.

32 Այն Աստուածը, * որ զօրութիւն է հագցնում ինձ. Եւ իմ ճանապարհն անարատ անում.

33 Նա * որ իմ ոտներն եղջերուների ոտների նման է շինում, եւ * ինձ՝ բարձր տեղերումը կանգնեցնում.

34 Նա * իմ ձեռքը վարժեցնում է պատերազմ անելու, որ իմ բազուկը պղնձի աղեղը լարեն։

35 Եւ տալիս ես ինձ քո փրկութեան վահանը, եւ քո աջը հաստատում է ինձ, եւ քո քաղցրութիւնը մեծացնում է ինձ։

36 Դու լայնարձակ ես անում իմ գնացքը իմ տակ, եւ * իմ սրունքները չեն դողում։

37 Ես կհալածեմ իմ թշնամիները եւ նորանց կհասնեմ. Եւ ետ չեմ դառնալ մինչեւ որ փչանան։

38 Ես կզարկեմ նորանց, որ չկարողանան վեր կենալ. Նորանք իմ ոտների տակ կընկնեն։

39 Դու ինձ զօրութիւն ես հագցնում պատերազմի համար. Եւ ինձ դէմ վեր կացածներին իմ տակն ես գցում։

40 Դու իմ թշնամիներին հալածական ես անում. Եւ ես ինձ ատողներին կփչացնեմ։

41 Նորանք կանչում են, բայց փրկող չկայ. * դէպի Տէրը Էահուէն՝ բայց նա նորանց չէ պատասխանում։

42 Ես կփշրեմ նորանց ինչպէս փոշի քամիի առաջին. Դուրս կթափեմ նորանց ինչպէս փողոցի ցեխը։

43 Դու ազատում ես ինձ ժողովրդի հակառակութիւնիցը, ինձ հեթանոսների վերայ գլուխ ես դնում. Այն ժողովուրդը, որ ես նորան չէի ճանաչում, ծառայում է ինձ։

44 Հէնց ականջով լսելով՝ հնազանդուեցան ինձ. Օտարների որդիքը ինձ շողոքորթեցին։

45 Օտարների որդիքը թուլացան, եւ սարսափում էին իրանց ապաստարաններիցը։

46 Կենդանի է Տէրը Էահուէն. Եւ օրհնեալ է իմ Վէմը. Եւ բարձրացած լինի իմ փրկութեան Աստուածը.

47 Այն Աստուածը՝ որ վրէժս առնում է, եւ * ժողովուրդները հնազանդեցնում է իմ ներքեւը.

48 Որ փրկում է ինձ իմ թշնամիներիցը. Եւ բարձրացնում է ինձ նորանցից, որ ինձ դէմ վեր կացան. Դու ազատում ես ինձ անիրաւ մարդիցը։

49* Սորա համար հեթանոսների մէջ կգոհանամ քեզանից, ով Տէր Էահուէ. Եւ քո անունին սաղմոս կասեմ։

50 Նա մեծացնում է իր փրկութիւնը իր թագաւորի համար. Եւ ողորմութիւն է անում իր * օծեալ Դաւիթին եւ նորա զաւակին մինչեւ յաւիտեան։